Organizata për mbrojtjen e mjedisit Gjethi po ndjek nga afër përmbushjen e premtimeve të kryetarit të Komunës së Kaçanikut për pastrimin dhe mirëmbajtjen e lumit.

Ndërsa pastrimet periodike të organizuara nga Komuna e Kaçanikut dhe MMPHI-ja vlerësohen si një hap pozitiv, Gjethi thekson se këto veprime nuk trajtojnë rrënjët e problemit të ndotjes. Komuna e Kaçanikut, nga ana tjetër, ka deklaruar se çdo vit organizon pastrimin e shtratit të lumit Nerodime dhe se planifikon rregullimin e tij në të ardhmen me mbështetje të MMPHI-së, si pjesë e përpjekjeve për përmirësimin e mjedisit. Në të njëjtën kohë, Ministria e Mjedisit, Planifikimit Hapësinor dhe Infrastrukturës (MMPHI) ka bërë të ditur se është duke realizuar pastrimin e lumit Nerodime në drejtim të Ferizajt, në një gjatësi prej 12 kilometrash.

Gjethi mirëpret këto përpjekje, por thekson se ato duhet të shoqërohen me masa më të qëndrueshme dhe efektive për të ndaluar ndotjen në burim. Organizata apelon për vendosjen e sanksioneve ndaj ndotësve dhe zbatimin e masave parandaluese, duke theksuar se vetëm veprime konkrete dhe të vazhdueshme mund të sigurojnë mbrojtjen afatgjatë të lumit dhe mjedisit në përgjithësi.

Gjeni videon këtu: https://www.youtube.com/watch?v=4_Nv8Mb53ZQ 

Lumi "Klina" në fshatin Llaushë të Skenderajt po përballet me ndotje të rëndë nga mbeturinat, ujërat e zeza dhe ndotës të tjerë. Për të trajtuar këtë çështje mjedisore, organizata IQS, në bashkëpunim me KDI, ka ndërmarrë një iniciativë për të gjetur zgjidhje të qëndrueshme dhe për të rritur ndërgjegjësimin publik mbi rëndësinë e mbrojtjes së mjedisit.

Në kuadër të kësaj nisme, u vizitua lumi ku gjendja ishte e rëndë nga ndotja dhe pastaj u vizitua edhe Drejtoria e Inspeksioneve të Komunës së Skenderajt, ku zyrtarët shpjeguan se po shqiptohen gjoba ndaj ndotësve dhe se mbikëqyrja e lumit do të vazhdojë. Ata theksuan se është e domosdoshme që qytetarët të jenë të vetëdijshëm dhe të mos hedhin mbeturina në lumë apo në hapësira publike. Ky angazhim synon të krijojë kushte më të pastra dhe më të shëndetshme për komunitetin, duke siguruar një mjedis më të sigurt për të gjithë.

Videon mund ta gjeni këtu: https://www.youtube.com/watch?v=0Lw7pJAD83M&t=3s 

Mitrovica po përballet me një problem të madh mjedisor, ndotjen e rëndë të Lumit Trepça, i cili është i mbushur me mbeturina, ujëra të zeza dhe ndotës të tjerë. Për të adresuar këtë çështje, organizata Mundesia, në bashkëpunim me KDI, ka marrë iniciativën për të kërkuar zgjidhje të qëndrueshme dhe për të rritur ndërgjegjësimin publik mbi rëndësinë e mbrojtjes së mjedisit.

Për të kërkuar një sqarim dhe për të diskutuar mundësitë e zgjidhjes, u vizitua Drejtori i Drejtorisë së Ambientit të Komunës së Mitrovicës, Egzon Sadiku. Gjatë takimit, Drejtori theksoi se vetëdijesimi i qytetarëve është një hap thelbësor për zgjidhjen e këtij problemi, duke kërkuar që qytetarët të mos hedhin mbeturina në lumë dhe në ambiente të tjera publike. Ai gjithashtu njoftoi se Drejtoria e Mjedisit ka ndërmarrë masa për të penalizuar ndotësit, duke vendosur gjoba deri në 500 euro.

Si një masë më të qëndrueshme, Komuna ka planifikuar vendosjen e pengesave brenda lumit për të mbledhur mbeturinat dhe për të lehtësuar procesin e pastrimit nga ekipet përgjegjëse. Këto hapa synojnë të përmirësojnë gjendjen e mjedisit dhe të kontribuojnë në mbrojtjen e resurseve natyrore të qytetit.

Videon mund ta gjeni këtu:  https://www.youtube.com/watch?v=N6-Jaj3d-EY

Një problem i madh për banorët e zonës pranë rrethrrotullimit që lidh rrugën "Muharrem Fejza" me rrugën C ka shqetësuar qytetarët për një periudhë të gjatë. Kanalizimi i hapur, që shpërndan ujëra të zeza në sipërfaqe, ka krijuar kushte të vështira jetese për ata që banojnë aty, duke përhapur erëra të padurueshme dhe duke rrezikuar shëndetin publik.

KDI, në bashkëpunim me partnerin e saj lokal, QPA, kanë marrë iniciativën për të adresuar këtë problem të rëndësishëm dhe për të kërkuar një zgjidhje të qëndrueshme. Së bashku me median Nacionale, u kërkua një sqarim nga Drejtoria e Shërbimeve Publike të Komunës së Prishtinës për situatën.

Pas shqyrtimit të situatës, autoritetet komunale kanë siguruar se do të ndërmerren masa urgjente për të mbyllur kanalizimin e hapur dhe për të pastruar zonën, duke e kthyer atë në një ambient të sigurt për kalimtarët dhe banorët.

KDI dhe QPA do të vazhdojnë të monitorojnë nga afër zgjidhjen e këtij problemi, për t'u siguruar që ndërhyrja e komunës të realizohet siç është premtuar dhe në interes të qytetarëve.

Videon mund ta gjeni në këtë link: https://www.youtube.com/watch?v=q7g3jb15_7w 

Në kuadër të auditimit social të projektit "Rregullimi i Shkalleve për te Guri i Shpuar" në Kaçanik, ekipi i grupit të auditimit, i përbërë nga anëtarë të komunitetit dhe përfaqësues të OJQ-së Gjethi, u realizua një vizitë në lokacionin e projektit për të vlerësuar progresin e implementimit të tij.

Gjatë vizitës, u bënë matje të detajuara dhe u zhvilluan diskutime rreth zhvillimit të punimeve. Grupi Auditues, së bashku me përfaqësuesit e KDI-së, shqyrtuan idenë e projektit dhe paraqitën disa propozime për përmirësimin e mangësive të identifikuara. Gjetjet dhe propozimet do të inkorporohen në metodologjinë raportuese të cilat do t'i dorëzohen të gjitha palëve të përfshira në këtë proces.